|
||||
有一個博士畢業後分配到一家研究所工作,伊成爲搿家單位學歷頂高個一個人。有一日伊到單位後頭個小河浜裏去釣魚,正好正副所長也垃拉釣魚。過脫一歇歇,所長放下釣竿,伸了只懶腰,蹭蹭蹭從水面浪飛一樣個走到對面上廁所。博士看得眼睛睜得老大:啥個情況啊?水上飄?勿會?所長上完廁所回來個辰光,同樣也是蹭蹭蹭地從水上飄回來。哪能回事體?博士生又勿好意思去問。嘸沒想到又過脫一歇,副所長也立起來,蹭蹭蹭飄過水麪上廁所。迭記博士差點厥倒:我是勿是到了一個江湖高手集中個地方?乃末博士生自家也內急了。哪能辦?小河浜兩旁邊有圍牆,到對面廁所要繞十分鐘個路,憋了半日天,伊也立起來往水裏跨:我就勿相信伊拉能過,我博士生就勿能過。只聽到咚個一聲,博士生跌拉拉小河浜裏了。兩位所長豪燥拿伊拉了起來,問伊爲啥要下水,伊講:“爲啥伊拉儕可以走過去?”兩位所長相視一笑:“搿條小河浜裏有兩排木樁子,迭兩天落雨漲水,木樁迓下去了,阿拉曉得伊個位置,所以可以踏了樁子過去。儂哪能勿問一聲呢?學歷只代表一段辰光,勿斷學習才能進步。
| ||