|
||||
文/侯寶良
11月11日是“光棍節”,蠻噱個。怪勿得近槍把交關組織儕搞各種軋朋友及相親咾啥個活動。
搿天我乘地鐵辰光像啥聽旁邊有個時髦“MM”垃煲手機:“噯,儂啥辰光脫光啦?阿拉脫光唻!嗯,感覺還可以,乃阿拉爺孃心定了……”聽得我汗毛豎起來了,哪能有迭能講閒話法子個。再聽下去方纔恍然大悟,“脫光”原來是“脫離光棍”個簡稱。阿拉鄰居老爺叔也起勁煞了,到處打聽或託人幫忙爲伊拉大齡囡兒尋對象。
其實婚戀是當事人自家個事體,有人相信一見鍾情,就有了閃婚現象;也有人看重日久見人心,好事多磨成正果,乃末就有馬拉松式個戀愛。有人認定隨緣而遇,有緣千里來相會,無緣對面勿相認,就有坐懷不亂鎮定自如該出手辰光就出手個大將風度。勿管阿里種思路,只要能過好日腳就好。想想阿拉儕是過來人,也理解爺孃個一片心意,真正美滿個婚姻家庭,就是兩家頭心裏想着對方,踏實過日腳。年輕人只要主觀浪向有成熟個婚姻家庭意識,就會有主動尋朋友個驅動,啥個嘸沒機會?就看電視裏向個相親節目,場面一個比一個大,到底成功率有多少高?吃勿準。垃拉眼下迭個開放文明個社會背景下出現介許多大齡未婚男女,正是經濟高度發展,情感思維摻雜過多利益所造成個。所以講“脫光勿脫光”關鍵垃拉自身,垃拉整個社會個價值取向個轉變。像鄰居老爺叔一樣個爺孃是有勿少,勿過迭個是可憐天下父母心,隔靴抓癢罷了。
| ||