文/丁迪蒙上海是移民城市，以往來上海個外地人老快就可以學會講滬語，小人就更加快了，辣辣小學裏，勿會得超過兩個號頭個。但現在個新上海人蹲了好幾年還是講勿來。更加可悲個是：連得上海小囡也勿會講了。國家提倡個是和諧社會，推廣普通話也勿是要去消滅方言個。啥葛道理儕勿會講了呢？

　　關鍵是學堂教育！

　　辣進幼兒園之前，勿少小人是會得講個，但一進幼兒園就開始逼牢伊拉只好講普通話了。要曉得，學語言最關鍵個辰光是十二歲以下，過脫就學勿大好了。小囡4週歲讀幼兒園，到小學畢業，剛好就是辣辣搿個階段。從幼兒園開始就拿講上海閒話個路全部堵塞脫，有眼學堂甚至勿許小人辣學堂裏講一句上海閒話。假使講了，五好班級要敲脫，三好學生就做勿着！辣搿能介個大環境裏，思維也就全部轉向普通話。

　　前一槍嚮明中學校慶，回到母校，想起一段往事。上世紀七十年代上海就推廣普通話了，我個語文老師普通話邪氣標準，阿拉是崇拜得勿得了。必過伊講普通閒話個辰光是老嚴肅個，同學儕老嚇伊個，但一到下課伊就會得到阿拉身邊來拉家常，辣迭個辰光伊用個就是邪氣親切、邪氣糯、邪氣嗲個上海閒話了。師生間距離一記頭就拉近了……

　　推廣普通話搭講方言是勿矛盾個。我是國家級普通話測試員，我個祖輩儕是本地人，我家鄉語言講得邪氣道地；伊一滴滴也沒影響我書面語言個表達。

　　前兩日天看雜誌，有篇文章講作者辣歐洲借小汽車自由行。借車行講導航儀漢語系統有三種選擇：普通話、粵語、滬語。作者認爲，勿勿少少上海人辣世界各地，連得老外也曉得要尊重上海人，特爲量身定做了導航系統，葛爲啥就勿能創造點環境讓上海小人講眼自家個本土語言呢？

　　學堂校長是否可以讓學生辣課間休息個辰光用上海閒話來交流，拿辣辣屋裏學着個上海話帶進幼兒園，搭老師一道講，勿要讓伊一進學堂就拿剛學得一點點個母語摜脫了。假使老師儕能夠下課用上海閒話搭學生仔隨意聊聊就好了。只要做到搿一點，我相信，上海小人還是應該會得講家鄉方言，方言文化還是可以得到傳承個。