|
||||
文/楊忠明上海灘浪陳巨來刻圖章是個頂級高手,伊刻圖章個名氣辣全中國是響噹噹個,民國辰光,張學良、張大千、吳湖帆也請伊刻過圖章,搿類名人個名字,其實還可以拖上一大串。
上世紀七十年代末八月個一天下半日,天氣邪氣熱,剛剛落過陣頭雨,地浪向溼溚溚,我個老師陸康帶了我到陳巨來先生屋裏向白相。踏進富民路33號老洋房前,陸康特地關照我,儂看見仔陳老先生,要畢恭畢敬聽伊講閒話,勿要多插嘴,伊是老上海混過來個人,肚皮裏曉得個好白相事體多是多得勿得了,聽得儂笑痛肚皮。我帶儂認得,儂以後有空可以多來請教請教陳老先生刻圖章個竅門。
走進陳巨來先生個房門,我看見房間裏靠近牆壁有兩隻小沙發,當中放了一隻茶几,左邊沙發浪坐辣辣個就是大名鼎鼎個大師人物陳巨老,右邊一個是陳師母,還有一個男小囡立辣方臺子旁邊,悶聲勿響,長得老清秀個,伊就是現在上海刻圖章個名家孫君輝兄。
巨老一看阿拉兩個人走進來,連忙立起來說:“小康,今朝儂來啦,儂老公公身體好?我倒蠻想伊,幫我帶一包龍井新茶葉撥伊,杭州來個朋友前幾日送撥我個,我一直捨不得喫。儂帶來迭個啥人?”陸康介紹,我個徒弟,叫楊忠明,伊會刻印鈕。我看見眼門前個大人物,長得清秀,頭勢梳了蠻清爽,眼睛邪氣有神,心裏嚇勢勢,抖豁豁,一句閒話不敢講,連忙對着巨老、巨老太太鞠躬。巨老手一揮講:“坐,坐,吃點茶,等脫一歇歇,儂拿印鈕出來讓我看看,到底刻得好勿好。”
巨老對陸康說,我搿幾日圖章生活忙得勿得了,眼睛刻得看物事也看勿清爽,幾個賓館裏送來個印我儕弄好了,吃力煞,賺不到幾塊洋鈿鈔票,連去書場聽書也嘸沒辰光,陸耀良幾次託人來講,要我脫儂一道去聽聽伊說大書,說是保證說得噱頭足,關子賣得多,哈哈,陸耀良搿個討厭坯,人是蠻好,還要請我去德興館老飯店吃蝦籽大烏參,糟鉢頭,草頭圈子。小康,儂看,伊拿來一塊老蹩腳個石頭,嘿嘿!是我吵了要幫伊刻印的……我辣旁邊聽仔笑了,巨老風趣、扎勁,講閒話不喜歡平平叫講,大家儕歡喜告伊茄山河,聽伊講講老早頭個事體。
我拿出一隻蛇印鈕撥巨老看,老先生拿出進口打火機,叮個一聲,點上一支萬寶路香菸,吸了一口,伊低頭眯着眼橫看豎看,最後講:“迭塊昌化凍石鈕刻得蠻好,蛇頭是扁個,不是圓個,要注意哦?楊忠明,下趟我拿幾隻印鈕借撥儂做樣子,伊拉儕交關古樸,儂幫我刻點怪獸、螭虎咾啥。”我點頭連聲說:“好,好個!”
記得,搿日仔,巨老還說:“小青年要用功,多學點本事,多看點舊書,跟牢我兩個刻圖章學生,小康,徐雲叔,多學點傳統藝術,不會錯個。現在有些小青年穿仔黑包褲,辣弄堂裏抖發抖發,瞎七搭八亂混亂白相,將來有得苦頭喫了!”
幾十年前印壇大師陳巨來先生講個迭點閒話,是我後來刻苦學習個動力和能量,難以忘懷!