文/錢乃榮程乃珊寫個書，出一本我買一本，伊辣《新民晚報》《青年報》浪向刊登個文章，我太太每一篇儕剪下來收集得煞煞齊。伊個文章阿拉特別歡喜讀，程乃珊女士大氣、雅緻、執着、勤奮，伊是傾其生命來細緻描繪真實個大上海個最優秀作家，誠如搿日追悼會廳堂浪個一副輓聯頭浪向四個字所寫：“情深意重，字切文真”。

　　伊處處弘揚海納百川、中西融合個海派文化。伊寫個上海lady，有“出得廳堂、下得廚房”個“大家閨秀”，有“上海男人最理想的太太”“小家碧玉”，也有“被西風吹醒”“追求自由愛情”個“摩登小姐”，還寫現今撥老公尊爲“玉皇大帝”個“全職太太”。伊寫《金融家》，寫《上海先生》，從寫一個個大上海個創業家、開拓者個事業當中，展現老上海個輝煌歷史搭創業風貌；她寫“上海先生中最富海派個性的一脈”個“老克拉”，寫子承父業、拓展家業個“小開”，也寫弄堂門口個“老皮匠”，當“紅衛兵”洗劫一空，用大卡車裝滿一車“戰利品”開到弄堂口，“老皮匠”跳出身來張開兩手攔牢車子：“你們不作興的！天氣冷了兩個老人總要留件衣裳給他們！”“革命小將”撥伊個行爲感動，從車浪摜下一隻箱子，“老皮匠”叫出兒子相幫拿箱子拎到抄家人家個門口。

　　從2002年開始，程乃珊應邀參加了李倫新主持個“上海大學海派文化研究中心”一年一度個學術研討會，還擔任了研究中心特約研究員。從此我搭伊有了較多個交往。我搭我太太參加了以伊爲中心個老上海海派文化沙龍活動好幾次。記得辣七寶老鎮旅遊剛剛熱起來辰光，伊帶阿拉搭鎮有關領導一道探討哪能弘揚海派文化。辣辣各種沙龍活動裏，伊個熱情、開朗、坦誠、睿智，伊對上海精緻文化搭傳統民俗孜孜勿倦個追求使我感動，伊經常深入生活開拓題材，葛咾伊個文章總歸介貼肉個。伊還寫過一篇《精緻文化更需要走近大衆》個文章，倡導傳播上海個文明。

　　2004年讀了伊《上海之音》短文，深受感動，乃末我寫了一篇《上海流行歌曲的春秋》長文；我又看了伊《甜蜜的回憶》一文，下決心出版我辣上世紀50年代收藏個“糖紙頭”。當我搭我太太、囡兒捧了幾大本夾糖紙頭個書到伊愚園路屋裏“獻寶”個辰光，搿日天伊邪氣激動，當場答應爲我《糖紙頭——海派文化的童年情結》一書寫序。她辣辣題爲《方寸之間讀海派》個序裏向講：“都說百年中國看上海。然百年上海卻是一部太沉重太深奧的歷史，要真正讀懂，談何容易！‘上海熱’熱了有好一陣，然大多數一提起上海史，似就是不離‘百樂門’、杜月笙、黃包車和旗袍……但是，如若你能讀懂和解碼方寸之間那張糖紙頭的內涵，你會從中發掘出一個研究上海史的新切入點。”

　　對啊！上海個輝煌歷史是上海個實業家、金融家、出版家、文化家咾啥搭平民百姓創造個，上海人慣於恪守規矩、安富尊榮，樂惠和諧，勿是像有個電視劇所描寫個搿種流氓打鬥、羣醜舞爪。“上海”，幾化迷人個兩個字啊，程乃珊忠實個寫出了上海個種種迷人，活龍活現個市民精神，搿個城市個味道。

　　程乃珊寫作到生命個最後一刻，辣末三篇寫上海人吃咖啡個文章，就是投到“上海閒話”版面浪來用上海話寫個，她還要阿拉幫伊拿文中有個上海話用字改改對，伊就是搿能個謙遜，搿能個認真！