|
||||
亦君/畫
『秋風響,蟹腳癢』,交關人儕會買眼『大閘蟹』到屋裡向解饞。葛末,螃蟹到底為啥叫做『大閘蟹』呢?經過一番查考,發現搿有勿同個講法。
現代作家包笑天晚年寫個《大閘蟹史考》,引用了蘇州古籍收藏家吳訥士個說法:『凡捕蟹者,他們在港灣間,必設一閘,以竹編成。夜來隔閘置一燈火,蟹見燈光爬上竹閘,即在閘上一一捕之,甚為便捷。此是閘蟹之名所由來了。』搿搭塊個『竹閘』,應該屬於硬造個名稱,伊實際就是『籪』。勿少人儕曉得,垃拉六朝時期,吳淞江下游個漁民發明了『滬』,搿種插拉河?淺灘浪個竹柵欄,退潮個辰光可以攔牢魚蟹;到仔唐代,由於『滬瀆』經常作為地名出現拉詩賦當中,漁民們為了避免概念混淆,根據『滬』個『斷魚蟹之退路』功能,拿伊改稱『籪』,所以陸龜蒙個《漁具詩·序》明確講『滬,吳人今謂之籪』。搿歇,『籪』仍舊是江南農村個傳統漁具,《現代漢語詞典》對伊迭能解釋:『攔河插在水裡的竹柵欄,用來阻擋魚、蝦、螃蟹,以便捕捉。』既然『籪』從來嘸沒叫過『閘』,『大閘蟹』是因為捕捉工具而得名個說法就立勿牢腳。
前兩日,趁到上海郊區去參觀蟹塘個機會,問過一位年長個蟹農:『老伯伯,儂曉得「大閘蟹」名稱是哪能來個??』搿個蟹農想了一歇,撈起一只螃蟹笑著講:『記得?阿奶講過,雌蟹個半圓形臍蓋像「大閘門」,雄蟹個尖臍蓋像「小閘門」,伊拉身浪向儕有一扇「閘門」,所以叫做「閘蟹」或者「大閘蟹」。鎮文化中心搜集民間傳說個辰光,我拿迭樁事體寫下來了!』搿個蟹農看見我有眼勿相信,就從屋裡向拿出一本鎮文化中心編個民間傳說集。搿個蟹農講個內容,垃拉前人筆記文獻搭仔相關書籍當中儕尋勿著,完全屬於一種民間傳說。『大閘蟹』是因為長相而得名個說法盡管生動,但明顯屬於硬裝榫頭,實在經勿起推敲。
其實,『大閘蟹』是從『大煠蟹』演變過來個。三國時期張揖個《廣雅》(後來改名《博雅》)提著:『煠,瀹也;湯煠也。音閘。』清代嘉慶、道光年間個蘇州文人顧祿,垃拉伊個《清嘉錄》裡向講:『湖蟹乘潮上,籪漁者捕得之,擔入城市,居人買以相饋貺,或宴客佐酒。有「九雌十雄」之目,謂九月團臍佳,十月尖臍佳也。湯煠而食,故謂之「煠蟹」。』埃個辰光,賣蟹人挑擔進城沿街叫賣,勿斷高喊『煠蟹唻大煠蟹』,成為秋天個一道風景。搿搭塊個『煠』是指煮,現在個《新華字典》仍舊拿『煠』列為『炸』個異體字,並解釋成『拿食物放垃煮沸個油或水裡弄熟』。螃蟹一般儕煠來吃,所以大家拿伊叫做『煠蟹』。老早黃浦江搭仔吳淞江出產個『清水蟹』,只頭大、肉結實,撥上海人稱為『大煠蟹』。大概是『煠』字比較生僻個緣故,日腳一長,諧音個『大閘蟹』就慢慢替代了『大煠蟹』,並且一直沿用到今朝。歸根到底,『大閘蟹』是因為烹制方法而得名。
文/朱少偉