|
||||
文/孔強新
阿拉小辰光讀書嘸沒像現在介緊張,功課也嘸沒像現在多得熱昏。到了禮拜天,有辰光去龍華白相。阿拉屋裏向離龍華勿算遠,走走只消半個鐘頭。龍華機場旁邊有條蠻寬個河浜直通黃浦江。河浜浪向有座鋪辣海鐵軌個水泥橋,阿拉經常辣橋堍邊頭等火車轟隆隆開過,也伸長頭頸巴望機場裏有勿有飛機起飛降落。看火車看飛機辣拉阿拉小辰光儕是交關扎勁個事體。
過了橋,緊貼機場河沿朝東幾百米,就到了黃浦江邊。迭個地方江水清清爽爽,也難板看見船開過。辣拉夏天,阿拉一幫十幾歲個小赤佬就辣江邊汏冷水浴。黃浦江勿像游泳池要買門票,也嘸沒人管。游泳池里人一多,礙手礙腳交關勿適意。迭個地方海闊天空,水性好個可以游到對岸浦東去,水性蹩腳個就辣拉江邊淺水地方撲騰撲騰。阿拉辣拉水裏白相得吃力了,儕爬上木筏子歇一歇。江邊有一排排木筏子。後來聽人講,來潮頭辰光,木筏下面有死人氽出來,心裏向交關嚇絲絲。嚇歸嚇,冷水浴照汏勿誤。
龍華鎮浪有座龍華塔,古色古香,最初辰光是三國東吳建造個,後來火燒了,重新造起。老底子儂立拉塔浪,可以望得見黃浦江。龍華塔北面辣拉馬路對面,有座龍華廟,年代也交關長。上個世紀三年自然災害辰光,阿拉屋裏向養了幾隻兔子,禮拜天阿拉拎只竹籃頭,跑到龍華附近河浜邊割青草。阿拉割好草,喜歡到廟裏向去坐坐。廟裏向勿售門票,也勿像現在香客人軋人多得造反,一年到頭冷冷清清,連和尚個人影子也嘸沒。阿拉親眼看見四大金剛身浪彩塑落脫勿少,露出爛泥脫稻草,真實做夢想勿到威風凜凜個四大金剛儕是用爛泥稻草做個。辣拉廟裏向東北角有個花圃,種植了幾株百年牡丹咾啥,迭個辰光老百姓飯也吃勿飽,哪有心思去看花?
只要袋袋裏向有角把鈔票搭仔幾兩糧票,阿拉一出龍華廟,饞嘮蟲就出來了,跑到對面鎮浪一爿飲食店買只油墩子吃吃。油墩子五分鈔票、一兩糧票一隻,外面糯米糰,裏向包個豆沙,氽得金黃油亮,咬一口,香噴噴,糯嗒嗒,交關好吃。幾十年過去了,阿拉已經滿頭花甲一把年紀了,還嘸沒忘記小辰光辣拉龍華吃個油墩子。
| ||