|
||||
文、畫程多多
想想現在真是道地,每當天氣出現雷電或者狂風暴雨個辰光,手機信息會及時通知大家早點作好准備。而每趟有大風雨來個辰光,我常常會回想到我小辰光所經歷過個下大水個場面。
上海地區垃拉夏天介辰光,經常性會落陣頭雨。剛剛還是蠻好個天,突然之間會得天墨赤烏黑,感覺就像夜裡,頓時飛沙走石,狂風暴雨。上世紀五六十年代以至到七十年代,垃拉延慶路華亭路以及長樂路富民路等一帶,由於地勢老老低,加上地下排水管年久失修,碰著一有傾盆大雨,就會形成令人尷尬個局面,也就是阿拉上海人講個『漲潮水』。有辰光雨落得邪氣結棍,一歇歇功夫,整條馬路像水滿金山,一片汪洋哉。上面落雨,陰溝洞裡齷齪水還會冒出來。當時我還是小學生,勿曉得下大水個辛苦,恨勿得叫整條被黑碴碴個水淹沒個馬路,當做大河?,裡向開開大兵艦。乃末看到開過來個大卡車興奮煞脫了,輪胎邊翻起來個白花花個波浪,真是波瀾壯闊。活脫勢像一艘軍艦垃拉乘風破浪。邊浪向個黃魚車賽過魚雷快艇,雖然卷勿起多少浪頭,但還是可以看得到水花沾到來勿及逃開個行人身浪向,各種狼狽樣。尤其是看到腳踏車搭卡車窄路相逢,有個辰光碰到搿個踏腳踏車個人,搿個老鬼【ju】三騎車技術勿靈,本來就抖抖歪歪,看見大卡車直衝自家過來,心急慌忙弄得勿巧,連車帶人一道跌下去。浸濕一身衣裳倒是小事體,弄出交通事故來,搿就勿得了了。從七十年代初,我就住拉一樓原來個鍋爐間裡,一旦碰到發大水個日腳,我就如臨大敵,拿浸勿起個物事豪燥朝高處擺。一定要搶垃拉水還嘸沒汆進來前頭就弄好。等到大水退脫,房間裡就像打過仗一樣,亂七八糟。看看對過沿馬路個人家還要作孽。老古閑話講:兵來將擋,水來土掩。勿過啥地方來介許多爛污泥?只好有啥用啥,情急之下舊門板、跳板、板凳、木箱咾啥統統撥伊用上去了。有常時聽到遠近一片驚呼,只看見拖把、掃帚、畚箕、面盆、甚至燒開水個銅吊儕拿來拷?。聽聽前面老遠傳來大呼小叫,再看看汆垃拉水面浪個木板、木箱咾啥跟了大水漂過來,就曉得前頭個潮水一定蠻大個。
現在上海已經看大勿見漲大水了。