|
||||
文/唐瑞清朋友道里茄山河,講上海人講究翻行頭,隨便阿能介個衣裳儕敢穿身浪。是個,但也勿儕正確。
上海灘從晚清《五口通商章程》出臺,東西方文化交融,各式各樣服裝鞋帽粉墨登場。1860年開始,“時髦”二字定格滬上,“海派”服飾一時浪頭成爲仔引領全國服飾時尚箇中心城市。伊做工考究、面料吃價、款式新鮮、品種海威。所以講,辣穿着高頭一直相當新潮大膽。可惜“大躍進”年代,老百姓袋裏嘸沒鈔票,連肚皮儕填勿飽,假使啥人有件把登樣眼個白襯衫,腳高頭穿雙7塊5角6分個豬皮皮鞋,乃末一弄堂人眼熱煞,會蹺大節頭:嘖嘖,時髦來,頂脫哉。辣我剛曉得打扮個辰光,覅忒刮三噢,服飾個命運徹底遭到“秋風掃落葉”。三天兩橫頭有人落到撥撕爛花村衫,剪破小褲管個悲劇……當初我穿過一雙“懂經”鞋,差點惹出場風波。講迭種鞋子像煞勿曾看見過,阿是?爺弄來個外國貨?儂年紀小小,穿奇裝異服,資產階級思想嚴重,還勿換脫?就拿伊厾進蘇州河裏喂【yu】魚!嚇得面孔夾料勢白,豪燥脫脫仔囥辣箱子底下。
“欲加之罪何患無辭。”其實照現在看,搿只是雙普普通通黑顏色個布鞋,小方口,鞋幫兩旁邊鑲兩塊二指半寬個鬆緊帶而已。要命,朝我兇聲凶氣訓斥個人天生大舌頭,閒話講勿清爽,拿鬆緊鞋講成“懂經鞋”,埃歇橫【wang】裏我勿歡喜穿跑鞋咾啥,因爲出腳汗臭烘烘難聞【men】得要死【xi】。鞋子是姆媽扎鞋底、上鞋面一針一線親手做個,樣子又好看又跟腳又透氣又輕巧,但是人家勿允許我穿。我心裏窮殟塞,心心想哪能穿仔就成資產階級思想嚴重了?接下來事體更加滑稽、更加殘酷。“破四舊,立四新”,街浪向男男女女穿清一色藍卡其上衣、黑剝落拓顏色個長褲;要末就穿假洋頭個軍裝……搿種日腳一直延續到“文革”結束。
只有辣國泰民安生活當中,方能顯出阿拉上海人穿衣裳百花齊放個勇氣搭風格!