|
||||
文/孔強新勿要看搿歇辰光馬路浪汽車、摩托車、助動車多得一天世界,勒垃三、四十年前儕是腳踏車撐場面。上班族除脫步行搭仔乘公交車外,腳踏車是主要個交通工具。
當年我分配到徐彙區一家副食品工場做生活,從屋裏向到單位有兩站路。姆媽看我走路勿便當,弄到一張腳踏車票,買了部28英寸鳳凰牌撥我踏。迭部腳踏車價鈿一百廿八塊,搿個辰光是一筆勿小個數目。小青工滿師後月收入三十六塊洋鈿,要買一輛腳踏車,牙齒縫裏得省個一年半截。勿過閒話講回來,小青年有了塊上海牌全鋼手錶搭仔一輛赤刮勒新個腳踏車,走起路來也神抖抖。
小辰光,我去外灘看輪船,到龍華去白相,儕是靠11路電車(兩隻腳)。搿歇好了,腳踏車一踏,快得像一陣風。我踏腳踏車有點投五投六,有一趟,勒垃金陵東路馬路浪,一勿小心車輪盤軋進2路有軌電車個軌道里向,鋼圈邊上個克羅米也擦脫了,還好額角頭高,人嘸沒摜疼。俗話講:用仔爺孃銅鈿勿肉麻【心疼】。迭部腳踏車雖然是我唯一個高檔物事,我個派頭也勿是一眼眼小,有熟人開口借,嘸沒一趟回頭過。搿個辰光國產腳踏車質量好,市面上最吃香個是一種車架子用錳鋼做個13型,邪氣結棍,勿過迭種車子交關難買。我迭輛鳳凰牌普通車也勿推板,車架子敲敲噹噹響,也蠻吃重。有幾趟車架子浪前後各坐一個,我踏仔兩個大人照樣跑。我尋開心講:可以踏兩隻大豬玀了。
我踏仔迭輛車子跑了上海勿少個鬧猛所在:城隍廟呀南京路呀老西門呀靜安寺呀西郊公園呀。熱天介夜裏向,有辰光想吃杯赤豆刨冰或者冰淇淋橘子汁咾啥,豪燥跳上車子,從肇嘉浜宛平路踏到淮海中路。我也踏仔車子到南翔、青浦朱家角兜白相。最遠一趟是去海門外婆家,勿過我嘸沒本事踏仔車子橫渡長江,是多買了一張船票,連人帶車搭船去個。後首我考進了上海西南角子個一所師範學院,開頭半年走讀,也是靠迭部腳踏車來來回回望學堂裏脫屋裏向兩頭跑,省了交關辰光。
我迭部28英寸鳳凰牌腳踏車踏仔十幾年,變成了一部老坦克。人總有一種喜新厭舊個壞毛病。我眼熱人家踏輕便車,也買了部26英寸個永久牌,老坦克就囥拉單位個車棚裏向。日腳長了,車身上儕是灰塵,我懶得去揩。如果擺到搿歇個話,勿是吹牛皮,迭部老坦克只要打足氣,照樣跑得邪氣快。