|
||||
文/楊保飛第六十期題目
上海閒話裏向,有得交關拿動物打比方個詞語搭仔句子,邪氣生動有趣。下面是老讀者楊保飛先生講個幾個句子,儂還講得出啥個搭動物有關個詞語。
答題請寄
威海路755號新民晚報活動專版部“上海閒話”欄目收郵編200041 E-mail:lvz@wxjt.com.cn
黃牛肩胛——老黃牛個體型老大個,勿過伊嘸沒肩胛個,牛頭直接連牢仔牛身體。比喻一個人勿敢承擔責任,賽過是“黃牛肩胛”。
黃魚腦子——黃魚個腦子是兩塊白顏色個小石頭。比喻一個人勿動腦筋,比喻迭個人老笨個,就講伊是“黃魚腦子”。
縮頭烏龜——烏龜只要受到一眼眼驚嚇,伊個頭馬上會得縮到烏龜殼裏向去,外加要過交關辰光,等伊覺着危險已經過去了,伊個頭纔會得慢慢叫個再伸出來。用“縮頭烏龜”來形容膽小怕事、嘸沒一眼眼血氣個人老確切個。
嘸頭蒼蠅——掐脫頭個蒼蠅,翅膀還會得撲騰撲騰,勿過飛起來完全嘸沒方向。比喻一個人做事體方向不明、嘸沒計劃,東打一拳、西踢一腳,就像“嘸頭蒼蠅”一樣。
蓬頭獅子——想一想雄性獅子豎起來個一頭毛髮蓬蓬鬆鬆,用伊來形容一個人頭髮、鬍子又長又亂,就像一頭雄獅子,蠻形象個。
老蟲做親——“老蟲”就是老鼠。搿種動物日裏向一般勿大出來活動個,葛末到仔夜裏向,就儕是伊拉個市面了。“老蟲做親”,通常就是指深更半夜個辰光忙煞。
老虎腳爪——巴掌打人老結棍個,叫請儂吃“老虎腳爪”。不過,還有一種傳統早點,也叫“老虎腳爪”,因爲伊個外形有眼像老虎個腳爪。
雞狗雞狗——當象聲詞來講,就好比“嘰咯嘰咯”,而十二生肖當中,據說“雞”和“狗”是“相沖”個,雞狗碰垃一道就“雞狗雞狗”搞勿清爽哉!
蚊子結——“蚊子結”專門用來指一種邪氣細小個接頭,譬如,垃拉紡織廠裏紗線、毛線打結頭儕是用“蚊子結”個,搿種接頭,勿但接頭個外形細小,外加交關牢靠,勿會鬆脫個。
雞爪瘋——儂看看雞個爪子,永遠捏勿起拳頭來,一個人個手,假使手節頭儕像雞個爪子一樣撐開來,抖抖索索個,啊是標標準準個戇大啦?
豬頭三——通常用“豬頭三”來形容“七勿老起、說話勿像”,“腳高腳低、嘸重嘸輕”個人,有眼“捧勿起個劉阿斗”個意思。
馬屁拍垃馬腳浪——想拍馬屁,卻拍到仔馬個腳浪向去了,撥馬狠狠個踢一腳。
黃鱔身體滴滴滑——用手是老難捏牢一條滑溜溜個黃鱔個。形容一個人油滑到仔極頂了,就像一條黃鱔,啥人也捏勿牢伊個,捉勿牢伊個任何把柄。