|
||||
路過復興中路明園高級住宅區個辰光,我就交關牽記老底子1201弄個老鄰舍。迭個弄堂搿個辰光是中心城區箇中檔住宅區,我讀高小到高中個辰光,阿拉一家門住拉埃面。住拉里向個人,有教師、職員、中小工商業主、牧師等。我覺着搿條弄堂裏個風氣比較好,從來嘸沒聽見過夫妻反目、鄰里糾紛咾啥個,吵相罵、打相打咾啥愈加嘸沒聽見、看見過。人告人之間儕是和和氣氣個,嘸沒嫌貧愛富、趨炎附勢咾啥個勢利相。阿拉住拉30號個底層,人多房間小,光線又老暗個,只要天氣好一眼,我就垃拉弄堂裏做功課。弄堂裏個爺叔阿姨看見我讀書用功,老看得起我個。
40號裏有一個退休個陸老師,老早子是留美學生,曉得我想學外文,就主動個教我讀英文,勿但勿收我一分洋鈿,還常常送文具撥我,勉勵我長大了要爭取做外交官。還有一個殷大哥,週末個辰光常常約我到伊拉屋裏向聽收音機裏個鋼琴演奏會、德累斯頓交響樂團訪滬演出咾啥。同樓(30號)三樓個唐家伯伯邀我到伊屋裏向做功課、聽英語廣播課咾啥;二樓個李家伯伯領自家個小囝去中山公園白相,總勿忘記帶我一道去。當時,阿拉屋裏比較貧困,但是大家看見我個爺孃老實,幾個小囡爭氣,待阿拉儕老好個。因爲家庭和睦,鄰居對阿拉又關心,讓我心裏覺着老溫馨個,學習告做小幹部啦啥個社會工作啦,進步老快個。小學五年級參加全市個作文比賽,得了三等獎,初中辰光數學競賽得過幾次獎。初中畢業後考上了大家儕老羨慕個大學預科。後來阿拉搬走了,我進大學以後忙得勿得了,就不大去1201弄白相。
再後來,就是“文化大革命”,大家日腳儕勿大好過,嘸沒心思看老鄰居,辰光一長,就失去了聯繫。現在,我已經七十歲快了,想起往事,總忘記勿脫1201弄個人搭事體。我覺着,我垃拉1201弄度過了人生中老重要個一段辰光,從埃歇辰光開始,我初步形成了比較健全個人格告陽光個心態。
1201弄個事體搭人,我永遠牽記,永遠感謝!