文/曹榮新(上海生物制品研究所)

　　阿拉單位去北大百周年紀念講堂演出，表演個滬語『弄堂歌謠』，居然獲得了大獎，迭個真個是紮足了阿拉上海人個臺型。從北京表演獲獎回來，伊拉儕跟我講，要好好叫謝謝夜報《上海閑話》迭只專版，辦得勿要太靈噢！真個幫了阿拉交關忙。

　　事體是迭能個，阿拉國藥集團要求全國各地個所屬企業用視頻上報一只節目，既要表演，還要評比。伊拉搭阿拉請個導演邪氣結棍，是CCTV文藝節目中心戲曲音樂部個趙導演，伊要求老嚴格個，迭趟演出可以講是國藥集團個『春晚』，大家儕老當一樁大事體。阿拉初排了一只歌舞串燒報上去，結果撥拉伊拉槍斃了。趙導演希望阿拉排一只有上海特色風情個節目，而且表演個辰光只有五六分鍾。乃末大家集思廣益，結果阿拉從新民晚報《上海閑話》版面浪得到啟發，創作編排表演了一只叫《上海祝福》個節目。先由二【ni】胡搭仔薩克斯中西樂器結合伴奏，男聲獨唱『上海灘』開始，接下來再由六只女生小白兔搭仔四個男生組合，用滬語表演『弄堂歌謠』，最後是小虎隊個《愛》表演唱結尾。結果迭只節目勿但通過了預審，而且垃拉北京個演出當中，受到了好評。大家覺著老新奇個。拍手聲一浪高過一浪，表演一結束，大家圍攏來問『弄堂歌謠』裡說唱表演個內容，儕講蠻有活力告童趣個，忒有地方味道了！迭只節目最終垃拉全國各地赴京匯演個廿只節目當中脫穎而出，獲得了『最佳創意獎』，排列前三名，阿拉覺著邪氣紮臺型，儂講嗲?！現在回想起來，人家四川、蘭州、新疆、北京等地表演個歌舞小品，也老靈個。不過阿拉要是嘸沒迭段滬語『弄堂歌謠』，節目恐怕就是死蟹一只了，評獎更加是想也勿要想。儂講要勿要好好謝謝新民晚報《上海閑話》迭個良師益友？！現在，阿拉拿《上海祝福》當中個『弄堂歌謠』歌詞唱撥大家聽聽：

　　男女合聲：過年嘍，開會嘍，國藥集團拜年嘍！

　　女：今朝北京贊，阿拉開心來，

　　集團面貌新，每只單位儕精彩！

　　唱起來，跳起來，生命健康有關愛，

　　儂也來，伊也來，儂也來，伊也來，

　　國藥明朝更加、更加贊！

　　男：垃拉北京看城頭，

　　垃拉上海看人頭，

　　城頭加人頭，碰拉一道別苗頭！

　　生產好、科研好、營銷好、管理好，

　　國藥文化交關好，方方面面儕叫好。

　　男女合：集團一家團結牢，朝牢500強快點、快點、快點跑！