|
||||
文/董月光儂相信?幾句上海閒話能夠拿一個“差生”變好,勿相信?葛末我來講撥儂聽聽。
記得有年新學期開始,我擔任初二個語文課兼班主任。班裏分來了個留級生。所有班主任邪氣擔心留級生,因爲老難帶個。留級原因複雜,成績差是關鍵。一隻班級只要一個留級生就夠了,班主任頂頂頭大。
開學第一天,我看有個長一碼大一碼個男小囡,背垃老大一隻書包,立垃拉二【ni】樓大廳裏。伊勿進自己教室,擡起頭朝三樓看,三樓是初三個班級。伊一面孔迷茫,老難過個樣子。初三老師走過辰光,偷偷告訴我:“迭個學生子原來成績勿錯,神志無知一日到夜打遊戲機,幾門課勿及格,是留到儂班裏個。我走到伊旁邊,剛想開國語。突然想,勿如用上海閒話講,比較隨便。我拍拍伊肩架,講:“哎唷,姚民啊!”
伊一呆【nge】,朝我看看。
“儂介結棍啊,打籃球一定老靈光!”
果然,伊麪孔放鬆交關。我馬上又跟上一句:聽?老師講儂作文寫得老靈個,暑假作業儂個幾篇作文真個老靈光啊。“我看伊開始對我有一眼眼好感,馬上接牢講:“儂來看自家老早個同學上三樓?有啥看頭啦!嘸沒事體啦!阿拉從頭開始,儂絕對可以學得比啥人儕要好。迭樣,我拿儂帶進教室,介紹撥同學個辰光,就講儂是轉學來個新同學,儂看哪能?”伊眼眶慢慢交變紅,偷偷瞄了我一眼。
我拿伊帶進教室,講:“阿拉鼓掌歡迎新轉來個同學!他是校籃球隊個呀!”
全班熱烈個掌聲讓迭個高個子男孩老意外,我眼睛個餘光瞟到伊感激個眼神。
迭個之後,我好幾次朗讀推薦伊寫個週記搭作文。再之後伊個語文成績每次大小考試儕勿低於80分,垃拉班裏名列前茅。接下來伊認得了幾個喜歡打籃球個同學,下課就去籃球場,又成了一名快樂個大男孩。最終,伊變得老好,成爲一名合格個畢業生。畢業照裏,伊立拉最後一排,笑眯眯,老神氣個。
上海閒話,讓我跟學生個距離一下子變小。讓一個自暴自棄個小囡變好。今朝我垃拉想,假使我開始用字正腔圓個普通閒話搭伊談話,乖乖,大概會嚇脫伊半條性命!真個想勿到,滬語個力道介足,居然讓一個已經灰心喪氣個學生,重新喚起對生活美好個追求,揚起了生活格風帆!滬語魅力勿可小覷哦!難怪哦,現在滬語又風靡上海灘!