|
||||
文/阮鑑祥一位曾垃拉上海中百一店工作過個同學講撥我聽過一隻笑話。
上世紀七八十年代,辣海上海商店裏,買末事除鈔票外,有種商品儕要付專用券。有一趟,一個外地朋友到伊櫃檯買一隻新產品—氣壓式暖水瓶,櫃檯浪個同事用上海腔個普通話搭伊講:要專用券。迭個外地男子聽勿懂上海腔普通話,以爲要伊“轉一圈”,心裏覺着奇怪,不過想想是迭家大商店賣末事個規矩,就等辣原地轉了一圈。等轉好一圈想買個辰光,營業員還是搭伊講要“專用券”,伊只好又轉了一圈。不過迭位營業員也覺着奇怪,迭個顧客要買物事,勿拿專用券出來,做啥老是等辣辣原地打轉。等到伊第三趟要迭個外地顧客拿專用券時,迭個外地人發火了,伊講勿賣東西撥我,做啥老是要我“轉一圈”,雙方几乎吵了起來。恰好櫃檯組長聞聲趕來,用比較標準個普通話搭伊交流,對外地顧客作了解釋,總算弄清爽啥個事體。