|
||||
文/宜青蘇州河從太湖流下來,下游流過今朝個上海普陀、長寧、靜安、閘北區等區域個地方,出現了大小河曲20多個,其中河曲曲度垃拉90度以下個有得好多個。現在莫乾山路、澳門路兩旁邊、上海最早建立個M50創意園區所垃拉個地方,就是邪氣突出個一個。
迭個河曲由西向東行來,到此地突向南面折過去,並朝裡收進,乃末南岸個土地便形成了一個大銳角,角端方向朝指東北。老裡八早搿搭就出現了一個叫『沙袋角』個名稱。搿一地名可能是因為搿一帶個河岸曾經有老多沙灘,所以除脫叫『沙袋角』之外,西邊還出現了『小沙渡』(在今西康路北端)迭能個名稱。至於『袋角』,當時因搿一塊銳角尖起突出,形狀賽過麻袋豎起來辰光個袋角個原由。
但是迭個『沙袋角』地名垃拉用字搭范圍浪,後來發生了兩個勿小個變化:一是1900年,阜豐面粉廠垃拉此地誕生,迭個是當時個上海,也是全國第一家最大個民族資本機器面粉廠。1914年後,無錫個榮氏兄弟垃拉此地先後開設了福新第二、第四、第八面粉廠,搿一帶赫然成了上海個一個『面粉王國』。面粉廠個工人日日要接觸大批個面粉袋,迭個粉袋豎起個辰光,兩邊棱角叉開,但伊又可交叉打結,即使勿加繩索也能暫時封口。乃末工人逐漸以近音拿『沙袋角』叫做『叉袋角』。稱呼用得長遠了,『沙袋角』地名就衍變成了『叉袋角』地名。二是『沙袋角』也好,『叉袋角』也好,起初僅僅指高頭講個河曲內側腹地,但隨著地域產業搭住宅區個成長擴展搭對外影響勿斷增大,『叉袋角』地名個實際使用范圍也向外圍推展:向南到達了海防路個南側,向北竟跨過了蘇州河,推進到了今朝天目西路到新客站之間河岸一帶。垃拉舊上海個有些地圖浪,搿一帶也因此標上了『叉袋角』搿一名稱。
『叉袋角』垃浪上世紀50年代以前,一直是當地個一個區域習稱地名,垃拉蘇州河浪搭滬西一帶,可謂小有名氣。不過自上世紀50年代以後,整個上海發生了老大個變化,一個個新城區接踵而起,對『叉袋角』個稱呼、使用也逐漸減少,並加速弱化。到80年代,勿要講整個上海,就是垃拉當地,搿個名稱也基本停用。而到今朝,垃拉整個上海,伊也鮮為人知,只有當阿拉垃拉細說蘇州河個古往今來個辰光,再會得重新提到搿個已經消逝個歷史地名,翻出與之相關個煙雲舊事。