|
||||
創作/楊保飛垃拉密州做官個蘇東坡已經有的整整七年嘸沒搭伊個同胞兄弟子由碰頭了,伊邪氣牽記伊個弟弟,常莊垃拉夢頭裏向搭弟弟見面,不過,醒轉來勿看見弟弟個影子,就更加覺得淒涼悲傷了。
搿日正好是八月十五中秋節,蘇老先生一介頭垃拉花園裏向吃悶酒,伊又想起仔伊個弟弟子由來了,葛是老酒一杯接一杯個,吃得來有眼眼醉醺醺個了。
勿曉得啥個辰光,一輪明月已經升到仔頭頂心浪了,地浪向是一片銀白色個月光。蘇老慢吞吞個立起身來,手裏向拿仔一杯酒、擡起頭來,呆頓頓個望拉天浪,唉,伊真想搭天老爺攀談攀談:“有道是,天浪一日、人間千年,天老爺啊,勿曉得今朝夜裏,搿天浪向算阿里一年呢?”
蘇老回到椅子浪向坐停當,手浪向個一杯子老酒又是一飲而盡,搿個辰光,伊個眼睛有眼迷迷糊糊個,只覺得自家好像乘仔一陣清風飛回到仔天浪向去了,看呀,美玉砌成功個廣寒宮漂亮得勿得了,不過,介高個地方實在是冷得來吃勿消!
一向浪漫豁達個蘇老先生又立起身來,伊覺得自家老想垃拉月光下頭跳舞個,月亮、伊自家還有自家個影子,一道翩翩起舞,勿再孤單,實在有意思。“講一句老實閒話,到天浪向去做啥呢,搿還是人世間好啊!”蘇老一介頭自言自語。月亮還是慢慢叫個垃拉天浪向移動,月亮光從硃紅色樓閣個一面轉到仔另外一面,雕花個窗框浪也塗滿濃濃個月色。蘇老心事重重,一眼嘸沒睡意,伊渾身上下就好像披仔一襲銀白色個長袍。
蘇老垃拉花園鵝卵石鋪就個小路浪走仔幾步,伊擡起頭來,面對天浪個皓月,伊又開始自言自語:“派派月亮勿會得有啥個怨恨個呀?葛末爲啥個事體,偏偏垃拉人家別離痛苦個辰光反而圓滿無缺個呢!月圓人勿圓,痛苦啊!”搿歇辰光蘇老滿腦子儕是弟弟子由個身影,揮之勿去。
“人有得離別辰光個悲傷、葛末也有的團聚辰光個歡樂,一樣個道理啊,月亮也有得陰晴圓缺個轉換,迭種事體從古到今,儕是難以周全個。”想到搿搭,蘇老先生豁然開朗,老人家一下子變得邪氣個精神。伊想:是呀,只希望世界浪向所有個親人,大家儕平平安安、健健康康,雖然遠隔千里,也儕能夠共享搿美好個夜晚、美好個月色。
搿歇辰光,蘇老好像看到了同胞兄弟子由正笑眯眯個朝自家招手呢……