|
||||
文/程乃珊勿曉得從啥辰光開始,“上海”前頭總歸撥人家加了一個“大”字,“大上海”長,“大上海”短。其實,上海閒話裏頭有交關“小”字頭,比方講“小洋房”、“小花園”、“小悠悠”……還有“搓搓小麻將”、“渳渳【mi】小老酒”、“小樂惠”、“小弄弄”……假使講,儂拿搿點“小”僅僅理解爲物理意義上個體積個大小,搿說明儂個上海閒話還勿夠靈光。再打個比方,“小悠悠”除脫應理解爲除了體積浪個大小外,更加有一種小巧玲瓏、精緻適宜個意思垃當中。
上海閒話“螺螄殼裏做道場”,活脫活個點出了上海人善用空間搭物質資源個本事。上海人形容出手大方個爲人處世爲“海派”或者“世海”。同樣個,一個“小”字,也現出海派跟世海個魅力。北方有句俚語:包子個口味搭包子個褶紋多少嘸沒關係。偏偏上海南翔小籠包,就是規定每隻包子只能有十八個褶子,多一折或者少一折就是勿正宗個南翔小籠包。可見,上海人對一個“小”字也一點勿馬虎。上海開埠近170年,傳奇輩出。勿少傳奇起步就垃一個“小”字。比如著名個國際飯店,因爲地基佔地面積老小,卻要造一幢遠東第一摩天樓,交關設計師儕勿敢接搿只生活,但鄔達克就垃拉這塊迷你個土地上創造了“遠東第一高樓”個奇蹟;還有著名個天廚味精廠,1923年是從南市個一幢兩開間石庫門裏向誕生個;此外,陪了阿拉幾代上海人個老字號品牌,像414毛巾、白象牌電池、奶油花生牛軋糖咾啥,儕是從弄堂小廠出來,名揚全國。
上海人海派,勿管大生意小生意,一樣認認真真做。信勿信由儂,上海有家百年老字號醃臘店“北萬有全”,火腿一兩就可以起售。按行規,一兩火腿要切成薄薄個廿八片,迭個絕對考驗師傅個刀功,然後拿火腿片像魚鱗一樣整齊個鋪排垃油紙浪,包好後再老當心個套垃牛皮紙袋袋裏,雙手恭敬個遞撥客人。夥計絕勿會因爲儂只買一兩火腿而對儂翻白眼。
上海閒話裏個“小”,裏向有着大道理。倒勿是真個數量個大小,而是一種大大個警示,大上海五光十色個引誘老大,生活指數高,稍微勿當心,破產、坐牢監個事體老有可能發生,難板放鬆放鬆是可以個,不過凡事勿好過分,點到爲止:三五知己朋友小老酒渳渳是可以個,不過吃得酒水糊塗,酒後駕車就討厭了;同樣個,買彩票搓麻將,小弄弄尋點小刺激是可以個,千萬勿要撲上全副身價。勿瞭解個人講上海人小氣,其實上海人只是小心翼翼個過自家個小日腳。
所以講,阿拉垃拉讚揚海派文化個高度跟深度個同時,請勿要忘記伊個“小”——精度。