|
||||
文/沈壽仁2013年元旦一過,學生仔連牢上了八天課,接下去一個禮拜就是大考,弄得兩個小囡讀書是讀得煞度【吃力】唻,真正是罪過【可憐】,罪過。記得阿拉小辰光讀書,特別是讀初中個辰光,大考大白相,小考小白相,搿個勿是講自家小辰光哪能聰明,讀書哪能來三,而確實是時代勿一樣了。
阿拉讀書個辰光,學堂、家長搭仔社會對小囡個要求嘸沒現在介高,壓力嘸沒現在介大,再加上“少年不識愁滋味”,所以碰着考試,好像嘸沒啥個好緊張個。還有,平常辰光多多少少總歸有得回家作業個,每天吃好夜飯也要垃拉廿五支光個電燈泡下頭做功課,第二天好交差。碰着考試了,作業嘸沒了,第一堂考試,答完考卷交脫,就可以到操場上厾厾籃球,踢踢足球或者嘻嘻哈哈,做做遊戲;第二堂考試考好嘛,就可以直接放學回去篤定白相了。
再有,埃個辰光蘇聯是“老大哥”,交關地方儕照搬蘇聯個一套,外語學個也是俄語,啥個特瓦利希【同志】、斯巴希巴【謝謝】、達斯韋達妮婭【再見】咾啥,現在儕派勿着用場了。平常作業搭考試打分也學蘇聯人實行5分制,5分優秀,4分良好,3分及格,2分就是開紅燈了。只要考到大約摸現在個90分以上,大致浪就是5分了,所以好像勿要花忒【太】大個力氣,學生手冊浪向常莊門門儕是5分,靈光了勿得了。現在個百分制,勿好推板一分兩分,勿見排名就可能落下去十幾名,實在吃勿大消,現在個小囡個壓力實在是忒大了。有一趟,我對我個孫子講,阿拉老早是大考大白相,小考小白相,伊眼睛撥瞪撥瞪看牢我,弄勿懂是啥個意思,心想哪能有介好事體!