|
||||
文/祁清籟大多數人並勿曉得,每年個2月21號,也就是明朝,是一個對於我伲有得特殊意義個日腳,就是“國際母語日”(International Mother Language Day),到明朝搿日,已經是第14個母語日了。搿個紀念日是1999年聯合國教科文組織(UNESCO)第30屆大會決定設立個,目的在於表達國際社會支持語言多樣性個基本態度,並且希望通過辣辣每年個搿一天開展活動來提醒全世界個人一道關心各自個母語,以及附着於語言高頭個文化傳統。
目前,世界浪攏總【總共】有得六千到七千種人類語言,其中一半以上嘸沒書面形式,大多數語言個處境相當艱難。對於地球高頭個交關民族來講,母語,搿一筆寶貴個文化財富,正辣辣面臨迅速失傳個危險。聯合國教科文組織從2000年開始,辣辣每年個2月21號舉辦豐富多樣個專題活動,邀請世界各地個瀕危語言使用者代表共同探討保存、延續各自母語生命個經驗搭仔教訓。
每一年個活動儕有得勿同個主題。2013年“國際母語日”個主題是:用於母語教育個書籍。關於迭個主題,聯合國教科文組織總幹事伊琳娜·博科娃女士認爲,“語言個活力,既取決於伊阿是辣辣口頭浪講,也取決於阿是有得大量使用搿種語言個教材搭仔讀物。我伲必須竭盡全力,確保儘可能公平個分發教材搭仔書籍,使得每一個人,特別是兒童,儕可以用自家選擇個語言,包括自家個母語來閱讀”。具體講到阿拉上海閒話個情況,大家儕能夠看到,近一搶,勿管是辣辣平面媒體,還是辣辣網絡空間,上海閒話個出鏡率儕比以往有所增加。特別值得注意個是,方言教材個編寫、出版、使用,目前有得一輪復甦個趨勢。方言是我伲每一個人內心深處最最親近個閒話。我伲現在之所以要辣辣推廣普通話個同時提倡科學傳承方言文化,是因爲和諧個社會離勿開繁榮個文化,包括薪火相傳個鄉土文化,也離勿開新老上海人之間個互相理解搭仔包容,葛咾大家也要相互瞭解勿同個語言文化背景。
方言是“母語”個一種具體表現形式。我伲紀念“國際母語日”,尤其需要理解其精神內涵,搭發生辣身邊個點滴小事聯繫起來。譬如講,現在勿少個爺爺唔奶【nna】、外公外婆儕歡喜搭小囡“開國語”(講普通話)。搿種做法個出發點是好個,是希望小囡能夠儘早個學會我伲個國家通用語言。但是如果變成功搭小囡只“開國語”,勿講方言,就未免有一眼極端了。搿能介甚至於可能影響小囡接觸、瞭解自家個母語,對伊拉個將來造成勿可逆轉個影響。搿眼細節問題,儕值得引起我伲個注意搭仔反思。
博科娃女士還講,“對於人類而言,多語言個使用,既是一種力量,也是一個機遇。保護語言有助於對人類知識個保護搭仔傳承,還能夠幫助我伲每一個人發出自家個聲音,並且獲得尊重,所以搿個是一種推動社會包容個力量。”希望大家能夠告訴身邊個朋友,明朝是一個具有特別意義個日腳,母語個命運也需要我伲365天來關心。