文/鄭自華1967年，我分配到一家區煙糖公司下頭個合作商店工作。其實就是老底子講個菸紙店，有20多個網點，文革前店名一般叫“聚興隆”、“豐泰興”，文革破四舊，儕改叫第幾門市部。門市部到總店進貨個工具就是腳踏車。

　　伊個辰光買腳踏車要憑腳踏車票，單位要買腳踏車，先要填寫“社會購買力”申請，由中心店申報，再由中心店報到區公司，區公司再送到區財政局，財政局審查通過，同意批准購買。腳踏車進貨勿僅要體力，還需要有眼技術。有個老師傅還有一手絕活，書報架後面放塊木板，拿兩格啤酒(一格有24瓶)踏了就跑，啤酒分量相當於一個成年男人個重量，懂行個人儕曉得。當踏腳踏車搭吃飯綁了一道，就是苦差事了。進商店個小青年一律學徒三年，學徒工鈿第一年只有16.84塊(國營商店是17.84塊)，當運輸工算普通工待遇，每個號頭工鈿30.60塊，6個號頭以後轉爲正式工，工鈿爲36元塊。運輸工每個號頭糧食是42斤，而營業員只有29斤。腳踏車是小牙盤的，迭能踏起來勿大吃力。一般情況下，一車可裝500斤左右個貨色。比如講，應該車600斤白砂糖，結果一車裝了1200斤。由於分量重，有一趟腳踏車鋼絲斷了幾根，輪胎氣也嘸沒，但是運輸照樣踏回來。運輸遠遠超過了“癩蛤蟆”(小三輪卡車)。由於運輸工是馬路天使，風曬雨淋。外頭人問做啥個生活，總是打過門，勿肯正面回答，伊拉個婚姻大部分是垃拉本單位解決，叫“自產自銷”，阿拉叫肥水勿流外人田。運輸工看中了拉拉門市部立櫃臺個小姑娘，就開始獻殷勤，主動拿總店貨物送到門市部，還拿貨色直接送到店裏，堆放好。當小夥子一身汗個辰光，小姑娘拿過來一條毛巾，或者送上一杯茶水，有辰光暗暗塞點糧票。對於小姑娘“豁翎子”，男小囝當然懂。雙方就軋起了朋友，最後成就好事。結婚典禮浪，有人問，雙方介紹人是啥人，伊拉講，是腳踏車！

　　腳踏車加拖車個“物流”，已經成爲了遙遠個歷史記憶了。